O DÍA DE DESPOIS DO SEXTO DÍA
Cando abreu o sexto selo
vin que houbo un grande terremoto. O sol virouse negro coma un saco de pelo de
cabra, e a lúa volveuse coma o sangue. As estrelas do ceo caíron sobre a terra,
o mesmo que caen os figos cando un vento rexo abanea unha figueira; o ceo
embrullouse coma se enrola un pergamiño, e todas as illas e montes remexeron
nos seus asentos. Os reis da terra, e os seus magnates, os tribunos, os
opulentos, os poderosos, e todos, servos ou libres, ocultáronse nas furnas e
entre os penedos dos montes.
"Apocalipse",
VI, 12-15.
|
Quen
posúa intelecto que calcule o número da Besta, pois é un número humano. E este
número é o seiscentos sesenta e seis.
"Apocalipse",
XIII, 18.
|
E
da boca do Dragón, da boca da Besta e máis da boca do falso Profeta saíron tres
espiritos inmundos semellantes aos sapos: os espíritos dos demos que efectúan
portentos para convocar aos reis de toda a terra cara á batalla do grande día do
omnipotente Deus. E axuntáronos no lugar chamado "Harmagedon" en
hebreo
"Apocalipse",
XVI, 13-16.
|
Vin
un novo ceo e unha nova terra, pois o primeiro ceo e a primeira terra
desapareceran, e o mar xa non existía.
"Apocalipse",
XXI, 1.
|
Permanecían arremuiñados, ensumidos en si mesmos, illados da
realidade polos seus auriculares e os seus cascos de sonido. En semellante
situación parecían en disposición de aceptar calquera incongruencia, por
disparatada que esta fose, ou as menos fundamentadas das afirmacións, coa máis
absoluta das incapacidades para xulgalas ou para decidir por si mesmos, mentres
engulían con degoro as novas acerca da argumentada e definitiva demostración do
desciframento final do número da Besta: a terrible ameaza que penduraba sobre a
humanidade.
Non o puido evitar. Sentíu un
profundo noxo. Porque aqueles seres, aínda que en apariencia e polo contido das
súas conversas, poidesen semellar capaces de posuir coñecementos, ou un estado
de opinión que lles permitisen tomar decisións, representaban a antítese do
home ceibe e cualificado, rei do universo, no que sempre crera. Limitábanse a
se laiar do seu infortunio, ou da lamentable incertidume daquel patético estado
de non guerra, mais tampouco de paz, ao que se vían abocados. Ningún semellaba
contar co pulo necesario para procurar solucións: nin tampouco ningún parecía
decatarse de que aínda era súa a posibilidade de decidir o seu destino.
Nun lugar próximo, un can e
un neno estaban a xogar sobre a herba que tapizaba os espacios abertos da pequena
elevación. O animal remexía sen descanso, a encollerse, ou a estarricarse, con
movementos que permitían o resalte da admirable perfección da súa anatomía. O
rapaz semellaba extemporaneamente feliz, mentres trataba de se comunicar con el
utilizando lacónicas expresións, aínda que non chegaba a percibilas con
claridade dende a distancia á que de ambos se atopaba. Soamente entón foi quen
de permitirse emocións distintas. Agora foi envexa o que sentíu, aínda que
tamén satisfacción. Porque, fronte a el atopábanse dous dos seres máis acabados
de aquel mundo, tan contradictorio e excepcional, que ata unha simple man chea
de area podía considerarse coma unha auténtica antoloxía do Universo. Ambos
parecían non estar contaminados, nin desnaturalizados, gozosamente alleos á
monstrosa manipulación que estaba a desvirtualo todo. Can e neno debían ser as
únicas criaturas auténticamente ceibes naquel seu, ademais de excepcional,
desventurado mundo.
Permaneceu un dilatado
período a se deleitar na contemplación daquel auténtico milagre, antes de
reaxir camiño. Ao mesmo tempo os seus pulmóns enchéronse co arrecendo dos
piñeiros e da brisa do mar. Alá embaixo este semellaba un espello enmarcado
polos montes, capaz de devolver ao espacio aquela luz feble e case enigmática
que precede sempre ao solpor. Había barcos a tracexar de ronseis a superficie
mariña, e na veciña cidade agromaba o xordo bruar da súa contina actividade, o
trepidar dos enxeños mecánicos, e o do seu trafego, máis notorio aínda,
posiblemente, dende aquel elevado lugar que no interior da mesma.
Por un intre pareceulle que
voltaba a se sentir inundado polo acougo, que esquecía a brutal ameaza: un neno
e un can felices, gaivotas, unha bandada de aves a esbarar maxestosamente por
un aire límpido..., ao lonxe o disco do sol medio coutado pola brétema do
horizonte; montes e campos decorados de verdume, e unha vila puxante á fronte.
¿Había algo máis admirable, ou máis merecedor da súa veneración e do seu
respeto?
Parecéronlle entón triviais as preocupacións que o levaran a
abandonar o amoreamento humano e fuxir do aquelárrico castigo das informacións
e do histerismo que principiaba a dominar a todos. Pensou que, ao mellor...,
quizais..., no fondo..., non se tratase máis que dun novo alarde de propaganda
barata, e que en realidade o perigo non era tan grave como se lles trata de
facer crer...
Moveu a cabeza e apretou con rabia as mans. Acababa de se decatar
de que, tamén no fondo, principiaba a pensar xa coma os demais. A confiar no
milagre. A agardar a que lle desen feitas as solucións...
"¡Non!", reafirmouse. Aínda non se podía resignar a
semellante claudicación. Porque, tal vez a diferencia de case que todos cantos
o arrodeaban, el si cría saber que era o que realmente covizaba, e as posibilidades
coas que o ser humano podía contar.
Algo que levaba anos a tratar de comunicar a todos, especialmente
aos seus cada vez máis queridos alumnos, aqueles diamantes sen brunir que a
sociedade ía pondo nas súas mans ano tras ano, aos que trataba de preparar cara
a un futuro que presentía, ou, quizais sería máis exacto dicir, que pretendía,
glorioso. Non podía aceptar canto estaba a acontecer sen traicionar a fe que
tratara de lles infundir, nin se podía resignar a que o que de tan teimudo xeito
lles estaban a facer crer poidese ser a única saída, o final, a conclusión sen
esperanzas. O planeta azul, a gloria de das galaxias, non se podía ver
abocado á extinción a causa da acción dun fato de irresponsables.
Trataban de os convencer da
inminencia do "Harmagedón", a definitiva, a derradeira das batallas entre o ben e
o mal. A mellor de todas alternativas, logo de lles demostrar que todas as
nacións, todos os orgaísmos, e mesmo cantas corporacións había sobre a terra,
contaban cos analistas e as mentes máis capacitadas e brillantes para acadar
solucións. E teimábase en ubicar o esceario daquel definitivo, e ó parecer
necesario, combate naquela "Har Meggidó", a "Montaña de
Meggidó", situada ao norte de Xerusalén, tal como lembraba que acontecera xa
nos anos da súa adolescencia con ocasión de un dos moitos enfrontamentos entre
árabes e israelís.
Para el, sen embargo, logo daquel frustrado e catastrofista agoiro
ficara definitivamente claro que non podía ser aquela a auténtica localización
daquel "Harmagedón" tantas veces anunciado.
Meggidó, asento dunha cidade máis de vinte veces reedificada ao
longo da historia, situada nunha lomba que dominaba a farturenta e dilatada
campa de Esdrelón e ao caborco que puña a esta en comunicación coa chaira
litoral, a través da serra do Carmelo, fora xa testemuña de moitos combates. El
mesmo tivera ocasión de contemplar a súa suxerente topografía baixo un xeneroso
sol, e era sabedor de que toda ela fora tripada en múltiples ocasións por
exércitos, exipcios, hititas, israelís, asirios, persas, macedonios, romanos,
sarracenos, cruzados, drusos, turcos, árabes ou británicos, os resultados de
cales combates a penas tiveran transcendencia nin conseguiran mudar
substancialmente a historia.
Os medios de comunicación,
sen embargo, estaban a aproveitar e a deturpar naquel momento estes feitos nun
intento de demostrar que era aquel o paradigmático esceario do nunca desexado
encontro do punto final. O servilismo dos informadores mesmo tendía a esaxerar
as habituais tensións entre árabes e israelís, ata convertilas en hipotéticos e
insuperables desacordos, aos que relacionaba con outros non menos imaxinarios
apoios a senllos bandos, coma xeito de convencer a audiencia da inminencia do
dramático desenlace.
Seiscentos sesenta e seis era
o número da Besta. A interpretación desta críptica cifra, realizada en base ás
máis sofisticadas lecturas dos valores numéricos das letras a través de
distintos alfabetos, daba coma resultado, precisamente, o nome do máis
representativo ideólogo da facción enemiga. Parecía ficar, pois, absolutamente
nidio todo. E, a partir de ahí, era xa doado saber tamén quen representaba as
forzas do ben e quen as do mal, así coma que eran eles quenes tiñan a fortuna
de se atopar no bando acertado. Con base a isto, parecía evidente que tampouco
deberían de se preocupar por nada. Mais non era esta a mensaxe que estaban a
lles transmitir. Algo había que os obrigaba a a ter cada vez máis medo.
Presentírao Gandhi, había tamén moito tempo: "Non debería
de haber lugar para máquinas que concentren o poder nunhas poucas mans, e
transformen aos homes en meros encargados delas".
Mais, desafortunadamente, tales enxeños existían, e tamén a
dependencia que aquel tan abertamente insinuara, xa daquela, coas súas
palabras. Tampouco era esta a primeira vez na historia na que a humanidade se
vira fronte a unha situación semellante.
O seu canto á capacidade
humana e ao seu futuro baseábase, precisamente, nalgo que partía deste suposto.
Habitualmente adoptaba presentalo por medio dunha reseña ou epítome, un breve e
sinxelo relato, capaz de ser entendido e asumido por calquera, que compendiaba
canto pensaba ao respecto. Tratábase dunha exposición que, de tanto contala,
chegou a ser quen de a repetir en calquera momento e situación, prácticamente sen
necesidade de pensar sequera, coma se dunha oración ou dunha aliteración
poética se tratase:
Procedía
das inmensidades do espacio exterior. Ao contacto coa atmósfera terrestre
acendeuse coma un mixto, e a súa temperatura aumentou rápida e inexorablemente.
Cando esta alcanzaba xa moitos miles de graos, estourou.
Esfarelouse no aire, igual que unha man de fariña botada ao vento, de xeito que
nada máis que o seu núcleo chegou a impactar co planeta. Mais fixoo batendo nel
cun peso, a causa da súa enerxia cinética, de moitos millóns de toneladas, que
fenderon o fondo do Océano,
A violencia da colisión desplazou a Siberia tres mil cincocentos
quilómetros cara ao norte. As súas augas xeáronse. Miles de elefantes,
rinocerontes peludos, tigres, e outros animais das súas chairas, pereceron
instantaneamente. Esgazáronse as montañas que abeiraban o inmenso mar interior
que ocupaba o actual deserto de Gobi. Unha avalancha incontible de auga de 25
quilómetros de frente saiu del, e barreu implacable as estepas asiáticas cara
ao occidente, ata o mar Caspio, o Negro, e o Mediterráneo, onde se detivo.
Erguéuse subitamente a Cordilleira dos Andes, disparando o porto
de Tiahuanaco, situado ata aquel momento ao nivel do mar, ata o lugar que agora
ocupa, a 3.825 metros
de altura.
Cun estrondo antes nunca escoitado, unha columna de lume, chea de
gases, cinzas e magma ardente, xurdiu das enormes feridas que se abriron na
superficie da Terra.
"O sur volveuse norte... E a Terra deu a volta",
lembrarían máis tarde os exipcios.
No seu confinamento da pequena illa de Patmos, Xoán o Teólogo,
deixaría tamén constancia escrita do seu coñecemento daquel terrible
acontecemento: "Vin unha estrela que caía do ceo sobre a Terra, á que lle
foi dada a chave do abismo. E abreu un profundo pozo do que subíu fume coma dun
grande forno, escurecendo o aire e o sol".
En miles de millas de extensión ardeu todo ou púxose
incandescente. Ferveu a auga do Océano. Quilómetros cúbicos de mar
convertíronse en vapor, que se mesturou coas cinzas e a poeira. As nubes
escureceron o sol. Os volcáns estouraron, sacudindo a Terra.
"Despois dun terrible día e dunha terrible noite, a illa
rexia dos atlantes afundíuse", lembraría Platón, en Atenas, séculos
despois.
A Corrente do Golfo puido chegar entón por primeira vez a Europa,
modificando o seu clima extremo. A capa de xeo que cobría Escandinavia, as
illas Británicas, e medio continente, desapareceu. Fundíuse parte do casquete
polar. O nivel do mar subeu considerablemente. Millóns de quilómetros cadrados
de terras da plataforma continental e das illas, ata entón habitables, ficaron
baixo as augas.
A civilización espallada polas terras que ocupaban unha parte do
Pacífico, a lexendaria Mú, pereceu tamén. Desapareceu o seu imperio de cento
cincuenta mil anos a mans dos cincocentos volcáns que había no seu territorio.
Os maias recolleron e transmitiron o feito a través dos tempos:
"Mú, a terra das colinas de barro, foi sacrificada. Despois
de terse erguido por dúas veces, desapareceu durante a noite. Minado por
debaixo por soterrados volcáns, cedeu o chan, e dez nacións ficaron arrasadas e
aniquiladas. Afundíronse xunto cos seus sesenta e catro millóns de
habitantes".
O vapor condensado na atmósfera retornou entón á terra en forma de
chuvias impetuosas. Incontables ríos de auga barreron canto se atopaba sobre a
superficie. O nivel medio das precipitacións alcanzou alturas incríbles.
O Xénesis lémbranos con suma precisión as consecuencias:
"Pereceron cantos seres se movían sobre a terra; aves, gando,
bestas, cantos animais pululaban sobre o chan, e todos os homes. Todo canto
tiña un hálito de vida nos seus fuciños e todo canto se atopaba sobre a terra
seca, morreu".
As bibliotecas de Babilonia e Nínive, nas chairas do Éufrates,
gardaron así mesmo a testemuña insólita dun dos escasos supervivintes da
catástrofe. O seu nome, Utnapishtim. Estas son algunhas das súas palabras:
Observei o estado do tempo
e vin que ameazaba tormenta.
Subín á nave e fechei o zapón principal;
Puzur Amurri, o bateleiro,
fixo o mesmo cos outros, e tomou o mando.
Cando apuntou a alba
unha negra nube cobría o horizonte.
No seu interior treboaba Adad,
mentres Shallat e Hanis ían diante,
a correr coma heraldos por riba das lombas e das chairas;
Erragal arrincaba as estacas dos encoros
e Ninurta precipitaba as augas.
Os "anunnaki" erguían os fachicos
e prendían os campos co seu lume.
A vasta extensión da Terra foi sacudida coma unha tarteira.
Durante un día soplou do sur a tormenta,
cada vez máis lixeira, asolagando montañas
e atinxindo a todos, coma se fose unha batalla.
Os deuses, coma cans acobardados,
agoucháronse onda a muralla.
Cheos de humildade saloucaban sentados,
apretando os beizos.
Seis días e seis noites
correron o vento e as cataratas do Ceo.
Ao séptimo día acougaron as augas.
Fixérase un silencio coma despois dunha batalla.
O mar volvérase tranquilo.
A estarrecedora tempestade cesara.
Ollei para aquel mar, xa maino;
os homes volvéranse lama;
a superficie da Terra era unha desolada e uniforme extensión.
..............................................................
Pavorosa descripción.
Tal era o relato que repetía constantemente, un ano despois de
outro, curso tras curso. Posiblemente, có paso do tempo mesmo debeu de ter
acadado unha certa calidade na súa exposición, posto que a reseña chegara,
sabíao perfectamente, ao propio cerne dos seus corazóns. De feito, moitos dos
seus alumnos eran capaces de repetir parágrafos enteiros da mesma, proba do seu
interese, e da angustia que o seu contido lles producía.
Non podía ignorar, sen embargo, que era moi posible que, en
realidade, nada tivese acontecido do xeito coma refería, particularidade, por
outra banda, que nunca tratara de ocultar coa intención de que ningunha das
súas alusións e metáforas poidesen ser considerados coma un xeito calquera de
manipulación. Tamén era certo que, canto afirmaba, procuraba basealo sempre en
toda unha cadea de testemuñas e situacións, tanto textuais e literarias, coma
xeolóxicas, e mesmo arqueolóxicas, que semellaban avalialo, de xeito que os
contidos de todo este tecido poidesen producir o efecto que trataba de
procurar.
A este respecto amosáralles aos seus alumnos diapositivas que
rexistraban pegadas, evidentemente humanas, en estratos xeolóxicos
antiquísimos, ou estudos acerca dos orificios atopados nas osamentas de seres
que viviran miles de anos antes de que tivese principiado a historia, que non
podían ter sido producidos senón por balas. Explicáralles así mesmo a fauna
siberiana e os achados localizados no seu xeado chan. Quería habitualos á idea
de que, moi posiblemente, a humanidade debía de ter padecido procesos cíclicos,
e que era moito máis antiga, e sobrevivira a máis destruccións das que o noso
actual estado de coñecementos parecía disposto a admitir.
De feito, a Ciencia non conseguira chegar aínda a un acordo
sequera sobre un feíto tan transcendental coma o da nosa orixe, dubidando
acerca de si o ser humano procedía dunha escisión evolutiva acontecida había un
indeterminado número de millóns de anos, a partir dun primate, ou se fóramos un
ser absolutamente difererenciado xa dende o principio.
A
realidade era que entre os científicos máis ortodoxos convivían diferentes
opinións, baseadas en estudos sobre o acervo xenético, diferencias
inmunolóxicas, bioloxías moleculares, ou análises químicos e estructurais,
efectuados sobre os máis antigos residuos considerados coma humanos cos que se
contaba. Tampouco conseguira explicar aínda satisfactoriamente ninguén a
convivencia no pasado de diferentes especies de homínidos, nin a súa
substitución, había a penas uns poucos miles de anos, pola actual especie
humana que, sen embargo, en tan curto espacio de tempo, pasara de estar
constituída por uns cantos e espallados grupúsculos de seres, a saturar o
planeta con varios miles de millóns de indivíduos.
Fora entre estas febles liñas que
tivera que elaborar a súa exposición narrativa.
Xunto cos seus alunnos analisara tamén
as 168 lendas que sobre diluvios foran recollidas entre as diversas nacións que
poboan a Terra. Estudaron, así mesmo, as placas continentais, a dorsal
Atlántica, a falla islandesa, e tamén aquela enigmática tranquilita atopada no
fondo do mar dos Açores, da que se sabía que vitrificaba en seco. Coñeceron
traballos topográficos que demostraban o alongamento do curso dos ríos baixo o
mar, naquela antiga plataforma continental, agora asolagada, así coma
fotografías de monumentos e diques artificiais que, aínda que cubertos polas
augas, era doado localizar nas ribeiras de todos os mares.
"Castigo
dos deuses", afirmara Utnapishtim.
"Castigo dos deuses", sinalarían os exipcios. "Castigo dos deuses", transmitíronnos os maias. "Castigo de Deus", sentenciara a Biblia. |
"Fixérase un silencio coma despois
dunha batalla". O silencio da morte. Os homes volvéranse lama. A penas uns
illados e reducidos grupos, asentados nos lugares máis recónditos, conseguiran
conservar a vida. Eles foron os herdeiros daquela ruína.
Lémbranolo Platón: "Cada vez que
as cousas se atopan relativamente orgaizadas, velahí que, a intervalos
regulares, coma unha enfermidade, as ondas do ceo caen sobre nós e deixan coma
superviventes aos iletrados e aos ignorantes".
Pereceran millóns de homes. Nada máis
lograran salvarse algúns dos que ocupaban os lugares máis alonxados e
inaccesibles: os iletrados e os ignorantes.
"Fixérase un silencio coma despois
dunha batalla". Un silencio de morte. Os homes volvéranse lama.
Desaparecera toda amostra de civilización e de cultura. A morte, a barbarie, o
desamparo e a desolación eran donos do mundo.
A súa voz, a súa expresión, e os seus
ademáns, pacentemente estudiados e calculados, foran os encargados de proxectar
sobre eles, durante anos, aquelas imaxes e súa mensaxe, destinados a preparar
as súas mentes e o seu espírito para o ideal que trataba de lles inculcar.
O relato, sen embargo, non remataba alí. Continuaba.
Porque, logo de lles facer ver en toda a súa crueza a postración e as
dificultades ás que a humanidade se vira entón abocada, procurara facerlles
sentir despois o orgullo de saber que aqueles escasos supervivintes, aqueles
infortunados antepasados comúns, espidos e desasistidos, souperan comenzar de
novo. E que, aínda acosados pola fame, a enfermidade, a miseria, a inxusticia,
a inseguridade, e mesmo a morte, conseguiran reaxir o seu camiño de séculos. Os
fillos daqueles iletrados e ignorantes sobreviventes conseguiran facer de novo
productiva a superficie do incomparable planeta no que lles correspondera
vivir, dominando o tempo, a terra, o mar, e o aire, e ata ás súas propias
limitacións.
Os fillos daqueles que se volveran
lama, tal vez por designio dos deuses, multiplicáronse e ocuparon de novo os
vastos territorios que se espallaban diante deles; xeraron novos pobos e
nacións, e souperon utilizar cantos recursos e posibilidades lles ofrecía a
pródiga natureza que os arrodeaba. O seu xenio permitíulles superar as máis
adversas dificultades. Os seus coñecementos pareceron non ter límites.
Gustara sempre de se recrear coas
reaccións que ían producindo as súas palabras. Advertíaas a través da súa
expresión complacida, ou do entusiasmo co que ollaban despois a paisaxe que se
acolumbraba a través das fiestras e dos ventanais, como se a sentisen máis súa,
e ao mesmo tempo máis admirable, ou máis merecedora de ser amada e defendida. E
disfrutaba tratando de adeviñar a satisfacción que debían de sentir por se
saber moradores dun planeta cheo de semellantes posibilidades.
Tal fora o seu xeito de conducilos.
Enorgullecíao poder afirmar que unha grande parte daqueles discípulos rematara
por militar en orgaizacións ecoloxistas, ou a realizar desinteresadas
actividades asistenciais entre os seus próximos nos países menos favorecidos.
Era o resultado de tantos anos de dedicación e entrega. Podía, en certo xeito,
asegurar que os tiña iniciado, ou feito partícipes, daquela vella afirmación de
Christiaan Huygens, que el tomara coma norte e guía da súa vida: "O mundo
é a miña patria, a ciencia a miña relixión".
Mais, tristemente, agora atopábase no
dooroso trance de ter que admitir o seu fracaso.
Porque o mundo non era coma el llo
amosara. O seu erro, o seu imperdonable erro, consistía en que tratara de
facerllo ver, máis que como realmente era, como lle tería gustado que fose, de
xeito que as súas palabras poidesen conducilos a cobizar aquelas elevadas
metas. Mais a realidade era ben distinta.
Porque, onda aquel home por el
magnificado, aquel ser con cobizas de eternidade, e paralelamente a el, había
outro do que nunca tivera o valor de se ocupar: o home que, ao mesmo tempo que
en coñecementos, medrara tamén en poder.
O Poder era, sen ningunha clase de
dúbidas, outra sorte de asombro merecedora de que tamén se tivese ocupado
compridamente dela. Porque o Poder era algo capaz, así mesmo, de acadar os máis
admirables logros. O Poder creara reinos e imperios. Fora quen de achanzar
montes, mudar o curso dos ríos, desecar lagos e mares, curar enfermedades,
incrementar a producción de alimentos, ou mesmo conxurar calquera outra ameaza
en forma de meteorito que poidese aparecer no espacio; feitos todos eles
admirables e demostrativos da extraordinaria capacidade humana para acadar
aquelas cotas de perfección, cada vez máis elevadas, tantas veces por el
loubadas.
Mais, e isto sabíao tamén
perfectamente, o Poder era ao mesmo tempo o xeito a través do cal acababa de se
manifestar a Besta que todo ser humano leva sempre no seu interior. Algo que se
evidenciaba a penas este conseguía acadar calquera pequena parcela do mesmo,
por cativa e efímera que fose.
Baixo os auspicios do Poder, os admirables
logros do ser humano, mesmo os máis relevantes, foran levados a termo con
sacrificio de dereitos, seres, pobos, e aínda de nacións enteiras. Todo en aras da
continuidade do propio Poder. Non nas do ben común, aínda que se chegasen a
utilizar auténticos sofismas e malabarismos dialécticos para tratar de facer
ver que era isto o que se trataba de procurar. No nome das dinastías, do
dereito, do propio ben común, dos avances sociais, da humanidade, da dignidade,
do honor, e aínda no nome mesmo de Deus, o Poder, en base a inamovibles
criterios, ou a máis que discutibles fundamentalismos, cobrábase día a día un
ininterrumpido tributo de sangue e de ilusións.
Nada disto ignoraba, aínda que se
tivese gardado sempre de mencionalo. Mais era agora, que semellaba xa tarde
para lle pór remedio, cando se decataba en toda a súa crueza da necesidade de
telo encarado.
Porque, no seu empeño por perpetuarse,
o Poder introducírase por cantas fendas e intersticios había na sociedade, nas
colectividades e nas orgaizacións, ata controlalas do xeito máis absoluto, de
maneira que ningunha outra opción, que non fose a súa, puidese contar coa menor
posibilidade. Utilizando tan sutil xeito de proceder, o Poder impuña as leis
que máis lle conviñan, xogando mesmo coa semántica das palabras que utilizaba;
discriminaba coa coor da pel, as crencias, as culturas, e ata co xeito mesmo de
pensar. O Poder falseou a verdade, a historia, e a xusticia, e utilizou,
desvirtuándoos no seu propio beneficio, ata aos propios designios divinos.
Anulou a individualidade dos seres humanos, e creou novos e intocables mitos.
O Poder controlou, manipulou e
orquestou a información; fixo mofa da lei e do dereito; e converteu a propia
existencia nun deturpado e perpetuo eufemismo.
Utilizou a escravitude, ou substituína
por servidumes e dependencias tan infamantes ou máis que a propia escravitude.
Asegurouse o sometimento e o control de pobos e de nacións. Masificou ao home,
anulouno, e utilizouno no seu propio beneficio, tirándolle o dereito á
liberdade e ao amparo da propia lei. Fiscalizou no interior do seu pensamento.
E, utilizando a súa inmensa capacidade técnica, convertíu a natureza e os mares
nunha inmensa e nauseabunda esterqueira que ameazaba gravemente o vital
equilibrio do planeta. Para o Poder e os seus acólitos, todo era válido,
xustificable, e mesmo desexable.
"O
home branco trata á súa nai, a Terra, e ao seu irmán, o Firmamento, coma
obxetos que se compran e se venden, coma ovellas ou doas de coores. A súa
cobiza devorará o mundo, deixando detrás nada máis que deserto. Xa non hai
lugar onde poder escoitar coma se abren as follas das árbores. Remata a vida
e comenza a supervivencia".
|
Levábaas gravadas na mente.
Lembraba perfectamente estas palabras, pronunciadas por un inculto e iletrado
indíxena de mediados do século XIX. Unha das moitas advertencias que o Poder
non quixera escoitar nunca. Porque para este tampouco endexamais se conculcaba
ningunha clase de lei. Nin siquera as da natureza, xa que esta -afirmaban
serviles sapientes- "regulábase a si mesma". O poder soupo
orgaizarse para acadar o cerne de todas as causas, de xeito que fose imposible
transgredir ningunha das súas disposicións, auténticamente transcendentes.
E cando os descendentes daqueles que se
convertiran en lama naquela triste xeira, aínda que capaces de volver a tentar
os medios para que a Terra se poidese converter de novo no paraíso capaz de
acobexar a cantos seres nela nacían e medraban; cando xa a humana proxenie
consideraba ter chegado ao límite da súa claudicación e dependencia colectivas;
cando parecían non ter xa máis nada que ofrecerlle e cabía agardar que o
seguinte paso poidese traer indicios sequera dunha cativa liberación, ou dun
pequeno e favorable cambio, o Poder atopara un novo e decisivo argumento
alienador: o da destrucción total.
Algo que rebasaba os lindeiros do
imaxinable, e tamén a proba do seu persoal fracaso coma conductor de seres. Por
que, ¿coma conxugar o seu dilatado canto ao humano liñaxe con semellante
realidade?
O Poder amosáralles un pequeno
utensilio. Un belo aparello de coor bermella, construído cun dos moitos e
sofisticados materiais que conseguira crear o inesgotable xenio humano. Aquel
obxeto, en apariencia intrascendente, estaba sen embargo destinado a se
converter na chave do futuro do planeta. Bastaba nada máis que alguén fixese
uso del.
A súa soa existencia detivo toda
posibilidade de razoamento, e sacrificou as inmensas posibilidades que todos
sabían que existían aínda: Converteuse no argumento inapelable, terminante,
definitivo.
O terrible, se é que despois de
semellante situación podía haber algo capaz de ser deste xeito considerado, e o
que máis fería a súa dignidade, era o ter a plena consciencia de saber que quen
tiña a potestade de dispor deste argumento non era ningún deus poderoso.
Tampouco se trataba de ningún personaxe doctado dun supremo intelecto, diante
do que non cabía máis camiño que amosar o máis grande dos respetos. Non.
Calquera cidadán estaba en condicións de advertir sen ningunha clase de
esforzo, que aquel privilexiado ser non posuía ningunha especial capacidade,
nin ningún excepcional índice de intelixencia que poidese facer crer, tanto a
el mesmo como aos seus demáis conxéneres, que fose superior a eles ou, cando
menos, que contara cunha particular aptitude para determinar que era o que máis
lle podía convir ás miríadas de seres que poboaban o mundo.
Non. A triste realidade era que non se
trataba máis que dun simple home. Un home arrodeado de todas as limitacións, e
padecedor das mesmas dúbidas e vacilacións que a inmensa maioría deles. Mesmo
había motivos máis que sobrados para sospeitar que era aínda menos libre e
capacitado que a maior parte dos habitantes da terra.
Tan só unha cousa o diferenciaba dos
demáis: que el tiña o Poder.
¿Ou sería máis doado pensar que en
realidade era o Poder quen o tiña a el?
Un ser coma este, pois, era o que podía
ter, ou crer que tiña, o deber de tomar a decisión de utilizar aquel bermello
aparello. Ningún outro de cantos ían ter que verse involucrados naquel inútil
holocausto, contaba. Ningún outro, e posiblemente tampouco o propio
responsable, coñecía en toda a súa complexidade a enmadeixada rede de
influencias, decisións, e intereses que podían conducilo a ter que adoptar
aquela solución extrema.
Non facía falta nada máis que xurdise o
detonante. ¿E cal podería ser este?: O medo... a conveniencia... a dignidade...
a desconfianza... a traición...
Continuaban a serlles repetidos ata a
saciedade o número e o nome da Besta. E aínda que ninguén se molestase en llos
lembrar, resultaba perfectamente doado decatarse de quenes poderían ser tamén o
Dragón e o Falso Profeta que aparecían onda ela na apocalíptica visión de Xoán,
o Teólogo. O panorama estaba xa perfectamente tracexado, mentres algúns dos
comentaristas aproveitaban a ocasión para efectuar auténticos alardes de
erudición e coñecementos para lles describir e visualizar a través de acendidas
palabras, dignas de mellor causa, a cova na que este recibira a revelación que
a súa notable prosa convertira despois naquel incomparable relatorio, fonte ao
mesmo tempo de estudio e análise ao longo xa de dous milenios. Cantos os escoitaban
acababan por se sentir trasladados á metade da montaña de Patmos, dominando a
ampla e azul baía que se dibuxaba aos seus pés, cara ao abrente, ou mesmo
créndose capaces de esculcar as saídas do sol por detrás dos outeiros da
inmediata illa de Lipsoi, e de imaxinar a límpida atmósfera do Exeo e a luz que
impregnaba a súa paisaxe.
Teimaban tamén, na súa mensaxe, na
existencia da inequívoca intervención de Deus en todo canto estaba a acontecer,
cousa que bastaba para convencer aínda aos máis reticentes, de que se atopaban
no campo axeitado. Por outra banda, aseguraban, eran tamén evidentes as
coordenadas marcadas polos catro primeiros selos a Xoán revelados, para que non
abrigasen dúbida ningunha: os xinetes da guerra, a revolución, a fame e a peste
cabalgaban xa ao seu antollo polo planeta, sacudíndoo de arriba a abaixo en
constantes, aínda que, de momento, controlados conflictos.
Silenciaban, ou pasaban por alto, sen
embargo, a terrible situación que, segundo revelaba o quinto selo, estaban a
padecer cantos tentaban defender a razón e o dereito. Era, evidentemente,
demasiado perigoso ocuparse dunha realidade coma esta, que se podía volver
contra o mesmo Poder.
O acento e a exposición cargábase no
sexto dos selos, de xeito que todos poidesen comprobar, coa máxima
pormenorización a exactitude da súa advertencia de que no mundo estábanse a
esfarelar todos os sistemas, e que xurdía a máis terrible das anarquías,... se
ben que nada máis que nos lugares non sometidos ao Poder.
Faltaba nada máis por se cumprir
a mensaxe do séptimo e derradeiro selo, a que anunciaba o resultado daquel
combate final entre o ben e o mal, o decisivo e inapelable "Harmagedón".
Morría o solpor. As sombras
cobregueaban xa sobre o agrisallado do mar e as abas dos montes, mentres no ceo
principiaban a escintilar as primeiras estrelas. As luces da cidade e as dos
buques da baía enmarcaban, chatolándoa, o resto da paisaxe. E corría unha grata
brisa a remexer lenemente a vexetación circundante, acariciando ao mesmo tempo
a masa capilar da súa epiderme. Aínda que de xeito case que inaudible, cantaban
tamén as corriolas.
Chegara xa ao cume do outeiro, onda a
hermida. Perto dela había un cruceiro de pedra, chantado no medio dun enorme
penedo. Algo máis abaixo, sobre o céspede, seguían a remexer, felices aínda, o
can e o neno, proseguindo o seu interminable e alegre xogo. Aos seus oídos
continuaba a chegar tamén o murmurio dos comentarios de xente, cobizosa de
información, afortunadamente demasiado lonxe para que os poidese entender. ¿É
que había aínda alguén capaz de atopar algunha verdade no medio daquela
desvergonzada manipulación? Semellaba coma se non bastase xa o drama ao que estaban
abocados, que aínda parecían ter a obriga de ter que tomar partido. Algo
tráxicamente absurdo. Estaban a seren conducidos ao exterminio, e pretendíase
que aplaudisen por semellante deferencia.
Sentíuse impotente unha vez máis.
Porque todo aquilo era real e tanxible, non producto do seu anguriado espírito.
O Poder atopábase en todas as partes, e contaba cos medios para alcanzar á máis
avisada das mentes, anular vontades, e decidir por elas. Contra isto era contra
o que non soupera preparar aos seus.
Algo o distraeu entón. Un pequeno ser,
negro e orelludo, de alas membranosas, pasou a revolexar onda el. Por uns
intres seguíuno na súa imprecisa traxectoria, en certo xeito semellante á dunha
volvoreta. Tratábase dun morcego, un dos máis sorprendentes habitantes do
planeta. Aquel extrano mamífero, capaz de voar, era en realidade un dos máis
vellos especímenes existentes. Xunto con algúns anfibios, certas árbores, e un
pequeno número de aves e insectos, era unha das poucas criaturas que, millóns
de anos atrás, cando aínda nin se sospeitaba sequera a aparición dos seres
humanos, conseguiran sobrevivir á catástrofe que acabara cos dinosaurios e coa
maior parte das especies que daquela poboaban a terra. Aquel diminuto ser
resultaba unha elocuente e excepcional testemuña no novo e extremo momento que
estaban a vivir.
Escoitou un brado. Un brado lene, aínda
que sorprendentemente sostido, contínuo, que se lle antollou que agabeaba polas
encostas, dende o pé mesmo do monte, a través da foresta e do propio aire do
crepúsculo. Advertíu coma o can detía entón, por primeira vez, o seu contínuo
remexer e se estarricaba cara o ceo. Despois, logo duns tensos momentos, veu
coma ouveaba. Un ouveo longo e perdido, que fixo estremecer todas as células do
seu organismo.
E foi así que el, o home, chegou a
advertir a causa. Estaba alí, no alto. Eran unhas liñas bermellas que se
debuxaban sobre a bóveda celeste mentres avanzaban velozmente cara ao poñente. Os
raios do sol, oculto xa detrás do horizonte, tirábanlles aínda brillantes
destellos metálicos.
Ficou abraiado. O tráfego, o pulso da
cidade, pareceron deterse tamén. Producíuse un silencio terriblemente compacto,
solidariamente colectivo. Cantos se atopaban en todo o que abranguían os seus
ollos pareceron decatarse por fin do engano. Veu como a maioría guindaba ao
chan os seus aparellos e pateábaos con desespero. Outros seguían aínda a
escoitar, como á procura de palabras capaces de os convencer do beneplácito e
da conveniencia da nova situación.
Mais era demasiado tarde xa. Tan só uns
minutos debían separar o encontro daquela mortífera andanada coa que procedía
do outro bando. A Besta tirárase definitivamente a careta, e amosábase a todos
en toda a súa ominosa irracionalidade.
Despois dun acelerado latexar sentíu
que lle mirraban as forzas. Deixouse cair de xoenllos, derrotado, vencido. A
súa man aferrou aínda un puñado de terra e levouno trémulo aos beizos. Era o seu
derradeiro acto de amor e liberdade. A súa despedida. Porque aquela pequena
porción de materia gardaba o arrecendo da terra húmida e fértil, patrimonio
único e insustituíble da humanidade:
"E
cando abreu o séptimo selo, houbo un silencio coma de media hora".
|
O día de despois do sexto día
descansara a suprema intelixencia. E nese mesmo momento, o home considerou
conveniente principiar a tomar as súas propias decisións.
A labarada convertíu en día a noite
eterna das galaxias, iluminando os planetas e os satélites mortos que arrodean
a Terra, ata perderse máis alá do espacio infinito.
Despois fíxose un silencio, coma
despois dunha batalla. Un silencio de morte.
Os seres humanos volvéranse pó. Triste
e definitiva consecuencia da súa incapacidade para discernir ou comprender que
era o que máis lle podía convir. O máis notable de todos os seres creados pola
suprema intelixencia que gobernaba o Universo acababa de tomar aquela
disparatada decisión.
Tíñano anunciado moitos. Nunca faltaran
os agoiros nin as advertencias, aínda que ningunha tan clara e precisa,
quizais, como a de Xoán. Mais a súa voz perdérase coma o vento no deserto.
Nesta ocasión, sen embargo, non habería
sequera un ignorante e iletrado aborixe, nin tampouco ningún outro Utnapishtim,
capaz de sobrevivir para reaxir de novo o camiño ou dar a postreira testemuña
de quen fora realmente a Besta, ou de insinuar que todo canto acontecera
poidese tratarse do castigo dunha divinidade calquera, por indubidables
motivos, resentida.
VIGO: 14-7-98 (Publicado na Biblioteca Virtual Galega no ano 2002). |
Comentarios
Publicar un comentario